Канонъ Святому князю Олегу

Песнь 1
Ирмос:
Моря чермную пучину невлажными стопами, древний пешествовав Израиль, крестообразныма Моисеовыма рукама, Амаликову силу в пустыни победил есть.
Припев: Святый преподобне княже Олеже, моли Бога о нас.
Заступника теплаго Брянския земли, князей похвалу и монахов удобрение, преподобнаго Олега воспоим, той бо силою Креста страсти и безплотныя враги победил есть.
Святый преподобне княже Олеже, моли Бога о нас.
Ангельски на земли пожил еси, княже Олеже, благаго корене князей Черниговских доброплодная отрасль быв, и яко воевода Небеснаго Царя, Отечество наше ныне ограждаеши.
Слава:
Смирению Царя царствующих подражая, власть и честь, славу и богатство Христа ради во уметы вменил еси и слезами постническими велиарову гордыню потопил еси.
И ныне:
Богородичен: Твоего Печерскаго образа в пределы Брянския пренесение и родителя своего от слепоты исцеление зря, князь Олег воспеваше благодать Твою, Пречистая.

Песнь 3
Ирмос:
Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.
Святый преподобне княже Олеже, моли Бога о нас.
Утвердил еси землю и люди твоя в вере православной, преподобне Олеже, княжением Богозаконным и подвиги монашескими.
Святый преподобне княже Олеже, моли Бога о нас.
Первую в земли Брянстей обитель во имя первоверховных апостол основал еси, святе Олеже, яко камень краеугольный веры.
Слава:
Нивы новонасажденныя делатель усердный явился еси, Богорачительный княже, мы же ныне славныя плоды трудов твоих пожинаем.
И ныне:
Богородичен: Источник исцелений близ Свены реки открыся - чудотворная икона Богоматере, Еяже благодатию укрепляемь, князь Олег мир конечне оставил есть.

Господи, помилуй (трижды).

Слава, и ныне:

Седален Святого, гл. 8
Смиренномудренно царства земнаго удалився, во иноцех тезоимением царским наречен был еси, княже Олеже, во знамение уготованнаго ти Небеснаго Царства, идеже ныне, яко царское священие, возвещаеши Христа Бога, призвавшаго тя в чудный Свой Свет.

Песнь 4
Ирмос:
Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.
Святый преподобне княже Олеже, моли Бога о нас.
Крест свой взем, себе и мира отверглся еси, преподобне Олеже, и вся козни вражия силою возлюбившаго тя Христа победил еси.
Святый преподобне княже Олеже, моли Бога о нас.
Агарян древле и зловерных нахождению паче меча молитвою противостал еси, и ныне Отечество наше от сих заступлением твоим избави.
Слава:
Земля Брянская красуется древом, питающим нас и покрывающим, - Олегом Богомудрым.
И ныне:
Богородичен: Егда иноцы созданныя тобою, княже Олеже, обители апостолов принесоша от Киева икону Пречистыя, тогда сила Ея в чудесех явися.

Песнь 5
Ирмос:
Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.
Святый преподобне княже Олеже, моли Бога о нас.
Мечем Божиим обоюдоострым именуем тя, яко душевредная посекаеши, в княжении - благоверием, во иночестве - преподобием.
Святый преподобне княже Олеже, моли Бога о нас.
Лице твое в час кончины просветися, Богоблаженне Олеже, и яко благий раб и верный в радость Господа твоего вшел еси.
Слава:
Избавляеши от бед в нощи греховной блуждающих, Неба церковнаго кроткая звездо, и к Свету Невечернему наставляеши, Олеже Богоносне.
И ныне:
Богородичен: Благословенная Владычице, просвети нас светом Сына Твоего, якоже древле очи Благовернаго князя Романа.

Песнь 6
Ирмос:
Пожру Ти со гласом хваления, Господи, Церковь вопиет Ти, от бесовския крове очищшися, ради милости из ребр Твоих истекшею Кровию.
Святый преподобне княже Олеже, моли Бога о нас.
Русская Церковь днесь всех созывает к похвале угодника Христова, преподобнаго князя Олега, от земли Брянския Отечеству нашему возсиявшаго.
Святый преподобне княже Олеже, моли Бога о нас.
Явился еси, преподобне Олеже, Православныя веры правило, монахов образ, людем предстатель теплый, граду и обители твоей ограждение.
Слава:
Небесное наследие и чудес благодать, возмездие трудов твоих от Бога приял еси, святе Олеже, темже не престай милостивно посещати тя почитающия.
И ныне:
Богородичен: Свенския иконы Богоматере явление чудное видев, купно со отцем своим, освященным собором и всеми людьми князь Олег благодарение Богу возсылаше.

Господи, помилуй (трижды).

Слава, и ныне:

Кондак, глас 2-й
Заступниче теплый Брянския земли, преподобне княже Олеже, купно со святыми сродники твоими Престолу Божию ныне предстоя, молитвами твоими Православие утверди, ереси и расколы разори, Отечеству нашему мир и душам нашим полезная испроси.

Икос
Отверзи честная уста твоя, Олеже благородне, и тайно глаголи во ушеса сердец наших, како трудом равноапостольнаго Владимира ревнуя, обитель первоверховных апостол во граде Брянске основал еси, како подобно Николе Святоше и Игорю Страстотерпцу мира отверглся еси, како, последуя прадеду Михаилу, безкровное мученичество в монашеских подвизех восприял еси и благочестие родителя твоего наследовал еси. О цвете прекрасный древа великаго Русских князей! Молитвами твоими Православие утверди, ереси и расколы разори, Отечеству нашему мир и душам нашим полезная испроси.

Песнь 7
Ирмос:
В пещи Авраамстии отроцы персидстей, любовию благочестия паче, нежели пламенем опаляеми взываху: благословен еси в храме славы Твоея, Господи.
Святый преподобне княже Олеже, моли Бога о нас.
Княжение, и род, и богатство оставив, подвизался еси боголепно в монашестем чине, отче Олеже, тем и ныне с преподобных лики радуешися.
Святый преподобне княже Олеже, моли Бога о нас.
Избавитися езера огненнаго моли Человеколюбца Бога всем, почитающим любовию святую память твою, преподобне княже Олеже, и добродетелем твоим подражающим.
Слава:
Якоже злато огнем, душу и тело искусив воздержанием, вниманием, и молитвою, и сердечным безмолвием, в порфире чистоты над страстьми царствовал еси.
И ныне:
Богородичен: Вся, елика виде исцеленныма очима князь Роман, окрестныя земли обители Твоей, Владычице, дарова, сын же его себе самаго в жертву Сыну Твоему принесе.

Песнь 8
Ирмос:
Руце распростер Даниил, львов зияния в рове затче: огненную же силу угасиша, добродетелию препоясавшееся, благоченстия рачители отроцы, взывающее: благословите вся дела Господня, Господа.
Святый преподобне княже Олеже, моли Бога о нас.
Елико велик в православном княжении был еси, толико в монашестем делании смирил еси себе, преподобне Олеже, темже и Бог тя превознесе и дарова ти чудес благодать; сего ради благословим о тебе Господа во веки.
Святый преподобне княже Олеже, моли Бога о нас.
Ревность велию показал еси ко благочестию, преизряден быв образ людем и учеником твоим, от младенства бо воспитався в законе Господни, чрез все житие волю Божию исполнити тщашеся.
Слава:
Одеяния худость не омрачи девственныя красоты души твоея, Богоблаженне Олеже, бдением же душевнеи твои очи просветися, и труды тяжкими плоть твою духу покорил еси.
И ныне:
Богородичен: Юже древле избрала еси гору в пределех Брянских во обитель иноком и образом Твоим Свенским освятила еси, Пренепорочная, невредиму сохрани, да воспевается в ней имя Сына Твоего во веки.

Песнь 9
Ирмос:
Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества, тем, веселящееся, Тя, Богородице, величаем.
Святый преподобне княже Олеже, моли Бога о нас.
Чаянием будущих благ веселяся, тесным и скорбным путем идяше, воздержанием и кротостию, смирением же и послушанием лику святых присвоился еси, с ними же тя величаем.
Святый преподобне княже Олеже, моли Бога о нас.
Трудолюбное по Бозе житие от юности возлюбив, преподобне княже Олеже, в меру возраста Христова достигл еси, и яко класс зрелый в Небесныя житницы пожался еси.
Слава:
Имамы святыя мощи твоя, Богоносне отче Олеже, яко ограду тверду граду Брянску и обители твоей, и сокровище неистощимое исцелений душам и телесем, темже тя величаем.
И ныне:
Богородичен: Мати Божия Пречистая, молит Тя преподобный князь Олег со всеми святыми сродники нашими, спаси землю Русскую и верныя люди Твоя утеши, да Тя вси величаем.

Светилен
Утреневав к Богу присно, тьмы вечныя избегл еси, преподобне княже Олеже, сего ради в час кончины лице твое просветися, и мощи твоя честныя доныне сияют нетлением и чудесы.

Ангела-Хранителя!