Святой князь Олег
День Празднования Памяти Святого благоверного князя Олега 03 октября нашего времени.
Тропарь гл.8
От юности возлюбив Христа всем сердцем, преподобне / славу земную, яко преходящу, оставил еси / и царство земное в ничтоже вменивше, / лику инок радостно причелся еси / и труды многими град Брянск, аки солнце пресветло, озарил еси: / тем, быв Троицы украшение, моли, княже Олеже, Христа Бога, спастися душам нашим.
Кондак гл.4
Уподобился еси плодоносней леторасли от корене честнаго, Олеже благородне,/ истину возлюбив и нетленный Христов живот./ Темже молитвою, бдением и пощением светильник великий быв твоим учеником,/ просвети, блаженне, Отечество твое и спаси души наша.
Величание
Ублажаем Тя, / благоверне княже Олеже, / и чтим святую память твою, / наставниче монахов и собеседниче Ангелов, / ты бо молиши за нас / Христа Бога нашего.
Молитва 1
О, преподобне отче, благоверне княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неустанный! Воззри, преблаженне, милостивно на град твой и весю нашу виждь чада твоя, смиренно ти припадающия и служити тебе хотящия. Не отвержи требующих твоея помощи, но яко благодетель и ходатай, моли присно Господа и Бога и Спаса нашего Иисуса Христа, да благословит державу Российскую, в мире и благоверии я сохраняя, князи и воеводы соделывая грозны врагом, боляры наставляя, грады умножая, достояние Свое соблюдая. Вознеси, Богоносче отче наш, сие малое моление нас грешных ко Владыце Христу, да утвердит во Святей Православней Церкви живый дух Православныя веры и любве, благочестие непоколебимое, любомудрие кротостию растворенное, да дарует пастырем ревность попечения о спасении людей, во еже неверующая просветити, заблуждшия наставити, отпадшия обратити и привлещи, изряднее вся чада Церкве Православныя чисты да сохранит от мирских искушений, похотей плотских, суемудрия, суеверий и наваждений вражеских. Ей, угодниче Божий, не презри нас, молящихся тебе, но помози нам скорым предстательством Твоим, да всяких бед, напастей и скорбей в сей жизни временней избежавше, кончину непостыдну обрящем, и тако на земли Богоугодно поживше, жизни райския на небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.
Молитва 2
Моли Бога о мне, святый угодниче Божий благоверный княже Олеже, яко аз усердно к тебе прибегаю, скорому помощнику и молитвеннику о душе моей.